政情：龐愛蘭：囝囝肯回流就買遊艇輪流揸
端午節應節活動不外乎扒龍舟同游龍舟水，沙田區議員龐愛蘭（Scarlett）就同兒子成功考取機動艇證書。Scarlett話難得同兒子有共同嗜好，每次喺溫哥華寓所外見到停泊嘅遊艇，都好想揸住出海，依家終於達成心願喇。佢仲話，如果喺澳洲做緊實習醫生嘅兒子肯回流返港，佢就會買艘遊艇同兒子輪流揸咁話，但遊艇係咪「利誘」到兒子，佢就話唔知喇。
Scarlett話，機動艇證書課程考試只係兩小時，要學識駕駛、停泊、拋錨、入油之外，仲要學識如有人跌咗落海要點樣拯救等。不過，呢個證書只係適用於加拿大、澳洲、英國，如果要喺香港駕駛遊艇，就要考取更高級嘅證書喇。因為佢兒子只係短暫回港，尋晚已要返回澳洲，惟有等下次返嚟先再考過。佢又話，見到一架深木色、似海盜船嘅遊艇，覺得好靚，但佢強調要個仔肯回港發展先會買，否則一個人揸就太浪費喎。