政情：怕大仔呷醋不滿 陳家珮盡量陪伴
通常生多過一個小朋友，為免出現爭寵嘅情況，作為父母嘅都要小心照顧年長子女嘅感受。去年年底誕下細女嘅南區區議員陳家珮（Judy）已為兩位小朋友嘅母親，佢就有個特別嘅方法應對避免出現爭寵。佢話，女兒啱啱出世時，佢當時只有兩歲嘅大仔都算聽話，唔會阻住佢餵細女，皆因佢坐月嗰陣，大部分時間都係陪大仔，等大仔唔會覺得有咗細妹後會「少咗啲嘢」，咁大仔自然就唔會憎妹妹喇。
Judy又話，佢生完囡囡，帶囡囡返屋企時特登去咗買積木送畀大仔，氹大仔開心，不過最重要始終都係陪大仔嘅時間唔好少過以前囡囡出世前，所以佢坐月時都唔會成日抱住囡囡。佢解釋，因為囡囡啱啱先出世，咩都唔知，唔會有比較，所以佢當時一餵完囡囡，就會放低囡囡，由得囡囡瞓覺，之後就將啲時間陪大仔。Judy咁識氹小朋友，相信佢個大仔應該都唔會詐型喇呱。