立法會議員不時都會外訪考察，慣常會有秘書處職員同行幫手。內務委員會近日有文件提到政府帳目委員會（帳委會）計劃派出由兩名委員及一名秘書處職員組成嘅代表團去吉隆坡出席工作坊，睇番開支預算，秘書處職員應急開支竟然只係得一百元，真係搭程的士都未必夠呀！
今次代表團係出席英聯邦政府帳目委員會聯合會亞洲工作坊，七月三十一日到埗，八月四日啟程回港，整個代表團預計花近二萬四千元，包括機票、膳食及雜項開支、旅遊保險，至於住宿連早餐費用，就由英聯邦議會聯合會英國分會支付。
不過，其中部分開支，就只係得秘書處職員有，包括往來機場與酒店交通、供職員中途使用嘅網上或電話通訊服務等，其中最顯眼嘅係秘書處職員嘅應急開支只有一百元，文件解釋係用「往來機場與酒店交通」，以及「雜項支援服務及其他」呢兩項開支嘅百分之五計算。點計出嚟都好啦，得嗰一百元，真係應到急？