政情：梁志祥認鼠患滿城 畀陳思靜寸唔見影
本港鼠患問題一直嚴重，身兼元朗區議員嘅立法會議員梁志祥（祥哥）尋日喺天水圍天盛苑附近擺街站，並講及近日鼠患問題，提醒街坊注重防治意識。不過就被當區區議員陳思靜拍片狙擊，話天盛嘅鼠患問題喺去年底已解決，反指祥哥所屬嘅天耀選區鼠患問題先嚴重，仲寸祥哥好少落區，畀街坊話冇影添。
祥哥話已聯絡部門跟進
祥哥接受查詢時解釋，佢並非針對天盛嘅鼠患問題而去當區擺街站，純粹係因為近來大鼠戊型肝炎肆虐，提醒吓街坊加強防治意識，防患於未然，強調自己係周圍都去擺街站嘅。至於被指其區議會嘅選區天耀嘅鼠患問題更加嚴重，祥哥對此亦都承認，仲話所以自己一直都有落區跟進，並且已經聯絡過唔少政府部門去改善，反駁話佢冇落區嘅質疑。
祥哥仲話，其實天耀同天盛只係隔籬區，好多時區議員都會做得「闊少少」，何況佢仲係立法會議員，落咩區都冇問題咁話，反寸陳思靜係咪對自己冇信心，所以一見到其他人落區就咁敏感咁話。