政情:羅致光硬銷年金 退休問題卸責市民

本港面對人口老化問題,但退休保障同安老政策一直為人詬病,推行多年嘅強積金早已被社會質疑未能為市民提供足夠的退休保障,政府早前更收緊申領長者綜援資格門檻,勞工及福利局局長羅致光被批評對長者涼薄。羅尋日出席一個公開活動時就進一步硬銷年金,又叫大家要做好財庫管理,唔好臨老唔過得世。政府退休保障做到一鑊粥,羅嘅IQ(智商)高達一百六十,唔通都只係識得推番個波畀市民,叫市民自求多福?

曾提終身年金制度 成效存疑

羅智光出席一個有關財庫管理嘅活動,佢致詞時話,自己四十幾歲時喺大學餐廳食緊碟唔健康嘅西多士,當時有班後生仔喺隔離話:「人唔好咁老,四十幾歲好死喇!」佢認為,現代人好多時都低估咗人嘅壽命,啲後生仔都唔去諗將來。佢又話,如果社會上有三、四成人都係退休人士,對整體經濟影響好大,同埋依家拎住三百萬元退休金都好難「過世」,所以有唔少退休或快將退休嘅人都會對往後生活有所擔憂,因為估算唔到往後日子嘅長短,少不免慳得就慳,生活質素自然有所下降喇。

羅所講嘅都係本港退休長者面對嘅難題,咁佢有咩解決方法呢?佢就話,二○○三年佢仲係立法會議員時,曾極力倡議保險界提供年金這類保險產品,可惜有關產品並唔普遍,直至一一年,佢就開始倡議成立公共終身年金制度,而去年政府就推出「香港年金計劃」,強調年金可以令退休人士預算每月收入,計劃開支,降低對生活質素嘅影響喎。

收緊綜援措施 基層長者捱苦

講到年金咁好,都要長者有錢去購買至得o架,對於仲要靠執紙皮維生嘅長者嚟講,有冇用都存在疑問,真係何不食肉糜。唔少政團同社福團體一直提倡全民退休保障,但政府就一味拖冇下文,仲連原本六十歲或以上長者可申領長者綜援嘅措施,都收緊至六十五歲長者先可申領,令基層長者更加苦不堪言。

不過,羅致光就好似活喺平行時空,點解咁講?早前立法會福利事務委員會嘅公聽會上,有要靠執紙皮維生嘅六十七歲婆婆呻搵工好難,點知羅就話可以搵勞工處協助就業,令到嗰位婆婆即場痛哭。羅依家喺度推銷年金,係「堅離地」定係口講推銷,實際推波,相信社會自有公論喇。

第一手消息請下載on.cc東網iPhone/iPad/Android/Windows Phone Apps