中環出更：葉劉為平權發言 斥周浩鼎杞人憂天
身兼行政會議成員同立法會議員嘅葉劉淑儀（葉劉）一向前衞，講嘅唔止衣着，仲有思想，事關佢過往多次為同志發聲，尋日更喺社交媒體上反駁比佢年輕一大截，但喺同志議題上立場較保守嘅立法會議員周浩鼎（Holden），質疑對方杞人憂天。事實證明思想開放程度真係與年齡無關嘅。
Holden憂裁決剝削異性婚姻
葉劉今次喺網上發功，大談日前有關公務員同性配偶福利及合併評稅權益嘅案件，同志公務員上訴得直一事，形容係另一重要里程碑。佢話，案中嘅同性婚姻關係合法、公開，亦係專有同牢固，並非隨便嘅親密關係，同異性伴侶無異，所以同性婚姻亦同異性婚姻冇分別，如單純因性傾向唔同就得唔到異性婚姻權利，係受到歧視咁話。
葉劉更點名提到Holden，提及對方話裁決係剝削異性婚姻，影響公務員福利。但葉劉就認為對方毋須過分擔心，因要睇裁決之後有幾多個案冒出先知，而佢相信異性婚姻始終佔大多數，唔會構成龐大福利開支。
葉劉並非首次為同志發聲，去年立法會辯論有關研究同志締結伴侶關係政策嘅動議時，佢都投下支持票，連已「出櫃」嘅立法會議員陳志全都話過想攬吓葉劉添。
卓妮