中環出更：唔准太太反口 鄧耀昇想要7個小朋友
今時今日，唔少人結咗婚都想享受二人世界，以致本港出生率一直唔算高。香港商業專業評審中心日前舉行證書頒授典禮，其中一位榮譽院士係香港亞太青年企業家協會會長鄧耀昇。佢致詞時就多謝媽媽、岳母同太太幫手照顧自己同小朋友，又自爆想有七個小朋友，而佢同太太喺兩年零九個月間，已經生咗三個小朋友喇，認真厲害。不過鄧太話，佢結婚嗰陣只係應承最多生四胎，對於係咪會再生多個，鄧太就笑笑口話要「諗吓先」喇。
鄧耀昇話，三個小朋友冇一個係孖胎，最大嗰個都只係三歲兩個月。睇鄧太身形纖瘦，真係睇唔出已經有三個小朋友。鄧太就話，生咗三個就自然會瘦，因為湊三個真係唔容易，好彩有父母幫手。鄧太又話，五年前結婚時老公已經話想生七個小朋友，佢當時話最多生四次，享受咗約兩年二人世界後，小朋友就陸續出世。而每次當生完BB，體重跌至產前嘅磅數時，就發現又再懷孕，依家生完第三個佢都已經想收工喇，不過老公就同佢講︰「你唔可以反口o架喎！」
香港資訊科技商會榮譽會長方保僑今次獲頒院士，佢哥哥香港理工大學企業發展院兼任教授方健僑都到場支持。方健僑話，成日有人話見到佢做節目，其實係弟弟方保僑。
方保僑圓四方帽夢
方保僑就話，同哥哥相差四年，細個成日打交，但哥哥好勤力，讀好多書，反而自己一直冇讀學位課程，所以今次都算係圓咗戴四方帽嘅夢喇。
同場仲有香港鐘錶業總會前主席孫大豪，佢係嚟恭賀現任主席李永安獲得榮譽院士。孫講起同哥哥把聲好似，以前同媽媽講電話，媽媽都會認錯佢係哥哥，話可能係由細一齊長大，所以語氣聲調都好相似咁話。
卓妮