政情：硬銷政策如農村圍城市 張國鈞大嘆政府無用
立法會議員陳克勤同張國鈞尋日孖住見記者，大談議會同地區工作，其中張國鈞就大嘆政府用「農村包圍城市」呢招無用，到底幾時出過呢招呢？
二人所屬政黨民建聯今年換屆，佢哋加埋議員周浩鼎同中西區區議會副主席陳學鋒都係做副主席，尋日就齊齊會見傳媒。
陳克勤：地區意見影響立會投票
陳克勤就講起地區意見會影響到立法會投票取態，好似三隧分流、垃圾徵費等，強調地區意見會獲得重視，角色絕對唔輕咁話。
身兼中西區區議員嘅張國鈞更大表認同，直言某政策局推銷政策會先去區議會，形容做法好似「農村包圍城市」，一心諗住搞掂區議會，甚至以通過議案去夾立法會支持，但根據經驗係唔Work，因為立法會同區議會兄弟關係緊密，非常一致同協調。唔知張國鈞所講嘅，係咪年初多個區議會都有討論嘅三隧分流呢？