政情：再傳荔枝有食肉菌 張華峰貼文阻截

肥老闆日前喺社交網站貼文，話依家係炎炎夏日，又到食荔枝嘅季節。唔好以為佢只係貪食荔枝，點解？事關佢話唔知點解，前年一個有關荔枝有食肉菌嘅「謠傳」，今年又再死灰復燃。

上載兩年前本報報道闢謠

佢話兩年前已多次喺唔同場合澄清，更有主流媒體報道，但今年又被「有心人」惡意喺網上不斷傳遞有關不實訊息，佢希望謠言止於智者，叫市民唔好相信網上謠傳，仲將本報喺兩年前載有佢澄清嘅報道上載上網。

荔枝有食肉菌係內地一則已被謠傳多時嘅舊聞，肥老闆兩年前收到呢個消息，亦有向朋友轉發，之後網上更瘋傳一則肥老闆溫馨提示嘅電話短訊，指荔枝有好多蟲，「國內人士死很多」，叫民眾為咗健康少買荔枝。而佢當日亦急急喺社交網站發聲明補鑊，話自己並冇撰寫有關訊息。點知事隔兩年謠傳再起，難怪佢咁緊張，要急急發貼文阻截喇。