政情：何啟明立會放「鼠」梁君彥喝唔住
近年鼠患日益嚴重，立法會議員都好關注，勞工界立法會議員何啟明尋日喺立法會大會上就鼠患問題質詢政府，準備咗幾隻「老鼠」話送畀食物及衞生局局長陳肇始，正主持會議嘅立法會主席梁君彥即刻叫何收埋啲「老鼠」，何於是提出抗議，認為啲「老鼠」同用嚟裝「老鼠」嘅老鼠籠都好細，唔會阻礙他人，但梁就話可能會影響立法會衞生喎。其實啲「老鼠」只係道具，係梁以為嗰幾隻係真老鼠見到都怕怕，定覺得道具都會影響衞生呢？
老鼠爬上膊 象哥扮驚
何啟明會上發言時話，政府指黃大仙區鼠患參考指數低，但唔少當區居民就反映鼠患問題嚴重，質疑政府標準點訂，仲叫政府唔好再用番薯做鼠餌，改用叉燒，何仲拎咗一籠「老鼠」出嚟添。雖然梁君彥一度要何收埋啲「老鼠」，但其他議員見到後，都貪得意拎嚟玩，其中進出口界議員黃定光（象哥）就將「老鼠」放上膊頭兼扮驚，再叫漁農界議員何俊賢影相上載到社交網站，笑指香港老鼠多到連立法會隻「象」都食埋，好似鬥獸棋咁喎。
呢幾隻「老鼠」幾可亂真，貪玩嘅象哥唔止自己玩得起勁，仲拎住啲「老鼠」去嚇陳肇始同議員，不過陳同議員葛珮帆都唔驚，而最驚嘅竟然係以滅鼠出名、被稱為「鼠王芬」嘅議員梁美芬。何啟明就話，聽講鼠王芬都係因為驚，先至要滅鼠咁話。
陳凱欣寸陳肇始齋噏
而會上多名議員批評政府滅鼠工作嘅不足，期間曾任食衞局局長政治助理嘅議員陳凱欣就寸其前上司陳肇始，話對方成日講「加強公眾教育」、「加強巡視」、「加強執法」，至少講咗十次要「加強」有關工作，質疑當局講就叻，實際上又另一回事。到議員郭偉強發言時就「搞爛gag」，笑稱陳肇始鍾意「加強」，但佢係「偉強」，質問陳肇始投放幾多資源滅鼠，以及用咩指標去衡量成效。
陳肇始回應質詢時話，依家國際上並冇一個鼠患參考指標，政府已參考各地指標去制訂現時做法，又話地區主導嘅方式係有必要，事關滅鼠涉及多個政府部門，需要佢哋反映意見，而防治蟲鼠督導委員會亦將開會研究對策。陳講到好似好有辦法，但如果滅鼠工作依然冇成績，下次開會見到嘅就可能唔係議員帶嚟嘅道具老鼠，而係真老鼠竄入立法會。