中環出更：懲教署三拒外出 邵家臻無法親提修正案
立法會今日辯論由立法會議員陳恒鑌提出嘅「推動醫療改革」動議，而因違法佔領行動案被判入獄八個月、仍喺赤柱監獄服刑嘅社會福利界立法會議員邵家臻，早前就向懲教署申請外出開會，以就該動議提出修正案。佢前日就喺社交網站貼文，指懲教署再度拒絕佢嘅申請，即係佢無法喺今日嘅大會上提出相關修正案，呢次已經係佢第三次被拒絕外出申請喇。
邵家臻提出嘅修正案要求政府擴大中醫喺公營醫療體系比重；就增加本地大學培訓醫生、護士、專職醫療人員名額制訂長遠政策；增加公立醫院及病床數目等。而邵嘅貼文就指，懲教署拒絕其外出申請嘅理由包括懲教署冇法律責任幫在囚立法會議員完成公職，立法會唔會因為邵缺席而停止運作，以及有關安排會涉及大量保安工作。而邵嘅議員辦事處就會同律師商討，繼續跟進喎。
議員要求邵考慮辭職
實際上，另一立法會議員張超雄於上周五已要求立法會內務委員會討論去信懲教署，要求署方批准邵家臻外出許可申請，以履行議員職務，不過最終被內會否決，當時有建制派議員明言，議員犯法唔應該享有特權，甚至有議員要求邵考慮自行辭職添。
卓妮