中環出更：撐老友記學嘢 張亮：年紀大冇記性係成見
上咗年紀先學習新事物，往往會被人嘲諷係「臨老學吹打」，即為時已晚，心有餘而力不足。不過賽馬會慈善及社區事務執行總監張亮就唔多認同，仲話以為年紀大就必定冇記性、難吸收新知識，恐怕係一種成見，又舉例指銀髮族嘅學習能力同後生仔相比，一啲都唔輸蝕咁話。
張亮尋日出席「全城‧長者友善」計劃嘉許禮，談及之前同北京故宮博物院負責人交流，得知故宮數年前實施網上售票，以取代現場排隊購票，對方仲話最快掌握網上購票嘅其實係老人家，因銀髮族空閒時間多，自然會學上網，反而俗務纏身嘅中年人學習動力就未必及得上老友記。張又話，儘管傳統觀念下長者被視為被照顧嘅對象，但依家銀髮族人數多，學識同資產都遠超過往，所以長者服務都要與時俱進至得。
麥敏媚：銀髮族閱歷豐富
今次獲得嘉許嘅一間餐飲社企嘅行政總裁麥敏媚話，年輕人於職場上無疑係有優勢，但重投職場嘅銀髮族唔止閱歷豐富，而且用心學習，責任感又強，亦係僱主眼中稱職嘅員工。至於另一間生產長者用品嘅社企嘅創辦人林鴻傑同梁渭聲就拍檔研製咗糅合照明、暖手器同連接互聯網嘅智能拐杖，話要提升居家安老人士生活質素。
同場仲有安老事務委員會主席林正財，同財經事務及庫務局前局長陳家強。林就話，按歲數來定義一個人係咪長者係一種好粗略嘅做法，因身體機能同心理狀態未必同歲數脗合。陳都好認同林嘅講法，仲話自己兩年前離開政府後，覺得雖然年逾花甲，但仍有精力發揮所長，於是就去大學做兼任教授。不過陳就慨嘆大學並非「年齡友善」嘅地方，希望院校可以打破年齡界限，鼓勵唔同年齡層嘅學生一齊學習，激發創意。
卓妮