政情：立會鼓勵走塑 推出環保產品

立法會秘書處紀念品店尋日新鮮滾熱辣推出咗保暖水樽、環保遮套、同埋經過修改，杯口尺寸細咗嘅咖啡杯。秘書處咁積極，唔知尊貴嘅立法會議員們有冇支持吓，幫襯買番啲環保產品傍吓身呢？

其實紀念品店較早前已經推出嘅木製筷子湯羹套裝，上個月亦推出可摺疊餐盒及高身飲品杯，設計咁多環保產品，相信都係鼓勵大家喺日常生活繼續減少使用即棄用品。

餐廳拒提供即棄用具

紀念品店以外，立法會餐廳都早已經加入環保行列，早於上年尾已開始「走塑」，即係停止派發塑膠飲管以及即棄膠餐具，但就會按個別顧客要求提供紙飲管，有關費用就「用者自付」。

至於外賣餐具就免費提供木製筷子同木攪拌棒，顧客亦可以向餐廳購買木製嘅叉、餐刀同匙羹。