八代美奈畝魅力沒法擋

好多日本寫真女郎之所以賣弄色相,其實都係想憑自己嘅美色爭取人氣,然後一步一步咁搵機會進軍影視圈,當佢哋達到目的之後,想佢哋再拍性感寫真都幾難。不過世事無絕對,亦有女優鳥倦知還,即使相隔10年一樣回歸寫真之路,好似八代美奈畝就係其中之一。

鎖骨夠迷人

小弟早前又約紅顏知己出街食飯,雖然佢已經三十幾歲,但係肌膚好似剝殼雞蛋咁又白又滑,加上平日少夜蒲多運動,年幾兩年冇見魅力依然,搞到我心如鹿撞,可惜進一步行動就冇喇,因為佢已經嫁作人婦,大家都係保持好友關係算啦。提到三十幾歲仲依然咁有魅力嘅囡囡,喺日本寫真界有好多絕佳例子,例如今日同大家見面嘅八代美奈畝。

現年34歲嘅八代美奈畝,艷麗程度比初出道嘅時候更強,曾經被盛讚嘅攝人眼神亦一如以往咁令人迷醉。至於身材方面,同樣保養得相當苗條婀娜,認真弗到漏!大家亦不妨留意一下美奈畝嘅鎖骨,佢話自己嘅笑容同鎖骨都係魅力來源。

自信心爆棚

美奈畝喺2005年出道,兩年後被選為第三代三洋物產彈珠機代言人,人氣火速上升,更有份參與演出電影,就係喺日本Cult片界甚有名氣嘅《機關槍少女》。喺電影中美奈畝表現出色,演技備受好評,仲話佢雙眼識做戲,而且比起當時嘅年輕派女演員有更強烈嘅存在感,由於美奈畝好有演藝才能,好快就成為電視劇以及舞台劇嘅寵兒,不過亦因為咁喺2009年推出寫真映像作品《Pavilion》之後就停產喇。

最近美奈畝喺相隔10年之後推出最新嘅映像作品《Lisianthus》,佢話半年前轉投另一間事務所,當時雙方都諗起要為寫真界嘅粉絲做番啲嘢,所以就決定去關島拍攝全新寫真集,作品已經製作完成並喺近日上市。唔知美奈畝對呢次回歸拍寫真畀自己幾多分呢?佢話一定係滿分,雖然10年冇拍寫真,但係一直都有做運動Keep Fit,而且演出自然,一定會令大家滿意咁話!

社交網站

簡介:近期八代美奈畝密密為最新寫真映像作品四出宣傳,想知道佢最近以及未來會去到邊個地方進行宣傳活動,就要留意佢嘅社交網喇!

網址:https://twitter.com/minaasy?lang=ja

八代美奈畝Profile

年齡:34歲

身高:5呎4吋

三圍:33-23-34

撰文:賢