政情：做完白內障手術 狄志遠「單眼」煮到飯
年紀大咗都好易患上白內障，前立法局議員狄志遠發現兩隻眼都患上白內障，上周四先進行左眼手術，預備一年後再做右眼，佢話手術過程中冇痛，亦都唔難受，當晚做咗「獨眼龍」都仲煮到飯。狄話，約半年前驗眼時，視光師發現佢對眼有問題，建議佢睇醫生，其後發現雙眼都有白內障，不過影響唔大，所以夾時間到依家才幫其中一隻眼做手術。
出街戴帽避免整污糟頭
狄話，手術過程好順利，期間提醒自己放鬆身體，讓靈魂走咗去，身體就交畀醫生，醫生亦好細心，畀足心理準備佢，約二十分鐘就完成手術，左眼加上眼罩並貼上紗布，第二日覆診仲拆得添！佢話隻眼暫時唔可以濕水，所以出街都會戴帽，避免整污糟要洗頭，亦要定期滴眼藥水，但開會睇文件已經冇問題，睇嚟真係復原得好快喎。