政情：北上怕賊人埋手 吳國安着白飯魚爛牛
好多港商喺七、八十年代，都開始北上內地做生意，但當年內地環境冇依家咁好，港商上去，都會搵啲方法保護自己。好似香港中華廠商聯合會副會長吳國安，近日接受訪問時就講起七十年代接手家族生意後，北上深圳寶安設廠，當年會特登着爛牛仔褲同白飯魚（白布鞋），亦唔敢帶太多現金，怕喺路上被人打主意。
認係自拍高手 會行山打卡
咁危險仲留喺內地設廠？吳國安話，當年喺內地投資雖然辛酸，但都好有滿足感，嗰陣喺香港工廠只有三十多名員工，但喺寶安嘅廠房規模係香港嘅幾倍，有一百名員工廿四小時輪班工作，廠房樓高三層，每層有萬五平方呎。
雖然吳國安自稱「廠佬」，但佢都幾緊貼潮流，佢喺訪問中話自己係自拍高手，又會行山「打卡」接觸大自然，閒時最鍾意做「毒男」，會去電腦商場睇吓有咩最新嘅產品。