中環出更：教育電視成效不彰 姚君達：內容水過鴨背
教育電視係好多學生嘅童年回憶，但節目內容同課程有關，未必套套都咁得學生歡心嘞。做開手袋買賣嘅商人姚君達對於教育電視就唔多欣賞嘞，佢話以前做學生嗰陣睇教育電視，已經覺得教育電視節目內容水過鴨背，學習成效不彰，其實教師要教學生書本外嘅知識，網絡上已經有好多資源，唔一定需要透過教育電視，況且教育電視嘅製作費用昂貴得驚人，真係應該要好好檢討喎。
凡事總有例外，保良局總理李何芷韻就係少數嘅教育電視「粉絲」，佢早前喺馬場出現時講起，無論係語文、數學定係常識節目，佢統統都唔放過，睇到津津有味，仲話細個嗰陣會越級睇教育電視，早啲睇定第日要學嘅內容，相信對成績有幫助喎！
李何芷韻話，自己小學讀上午校嗰陣，有啲課堂都會播教育電視，但係放學之後返到屋企，佢都會跟住下午班嘅時間表，再睇多次教育電視，大讚教育電視內容生動有趣，父母同子女一齊睇，係一項唔錯嘅親子活動。
佢仲話，細個有個特別嘅習慣，就係會揀高過自己學習程度嘅節目嚟睇，譬如佢讀小六時，就會揀初中嘅節目，雖然有時未必完全理解節目內容，但可以提早掌握將來要學嘅知識，都係一件好事。睇嚟佢細個一定好鍾意讀書！
蘇陳偉香求學期間冇得睇
轉個頭又見到仁濟醫院前主席蘇陳偉香同丈夫蘇啟聲孖公仔咁現身，蘇太話，自己求學期間仲未有教育電視，到底成效如何，就唔太清楚嘞。
不過，佢係某間小學嘅校董，嚟緊都打算向校長了解吓，學校點樣安排播教育電視咁話。
卓妮