政情：公民講場：陳肇始 監管屠房不力 當市民提款機

上水屠房三周內出現兩宗非洲豬瘟感染個案，政府繼上月進行殺豬行動後，又要再將有關屠房四千多隻活豬銷毀，引起業界哄動，質疑政府監管屠房運作流程不力，搞到病豬有機會同其他健康豬隻「共處一欄」，甚至流出市面，最終又係「殺豬賠錢」。學者同立法會議員都鬧爆食物及衞生局局長陳肇始，直斥三周爆兩宗個案，每宗政府賠幾千萬元，咁用公帑都唔係辦法，批評政府當香港人係提款機。唔通陳真係諗住啲錢唔係喺佢荷包拎出嚟，所以賠錢都覺得冇所謂？如果真係咁，再爆多幾宗出嚟，恐怕庫房啲錢都要賠清光，納稅人真係多得佢唔少喇！