政情：榮升公公唔湊孫 樹根忙老年創業
香港人工作忙碌，好多年輕爸爸媽媽生咗小朋友後，都需要佢哋父母幫手照顧，前立法會議員鍾樹根（樹根）啱啱榮升公公，仲喺Facebook貼咗同太太、孫女嘅合照，孫女足足有三公斤重，非常健康，樹根都好高興，不過樹根就話唔打算幫手湊，事關佢依家忙緊老年創業，管理緊幾間公司，都冇乜時間幫手照顧孫女，所以主力都由佢太太幫手。
玩喊細路 「自首」交畀太太
忙固然係原因之一，不過樹根都大爆自己唔多識湊小朋友，直言自己換尿片都唔識，就好似當年個女出世，都係交畀太太照顧居多，搞到太太以前成日都投訴；佢隨後又「自首」，每次玩到個小朋友喊之後，就交番畀太太咁話。
問到想唔想追多個孫仔，樹根就睇得好開，直言由得女兒同女婿決定，不過根據佢個人觀察，話八十後似乎比較鍾意生小朋友，仲話五十後、六十後都唔鍾意生，七十後鍾意養寵物，唔知佢個女同女婿又係唔係咁諗呢？