政情：武俠小說迷黃偉綸 籲學生勤「練功」
近日有古裝武俠劇於免費電視台熱播，發展局局長黃偉綸尋日出席一個學生活動上自爆係武俠小說迷，佢提到武俠小說入面，啲主人翁個個都會有奇遇，繼而學識絕世神功，但佢提醒學生，現實冇奇遇呢樣嘢，鼓勵大家要勤力「練功」，唔好等有奇遇來臨，努力先會有回報！
讀過法律 隨緣無執業
黃偉綸尋日一講起武俠小說嘅精彩情節就講唔停，佢形容有啲人物鍾意強求絕世武功、強求要報仇，結果弄巧反拙，個個都冇好下場，故佢認為，大家現實想要成功，除咗努力同勤力，仲要隨緣，好似自己咁，唔會夾硬講「明日大嶼」填海計劃。
講到隨緣，黃話自己後生時讀咗個法律學位，本身想做律師，喺法律界大展拳腳，點知最後都係冇做到，但佢就提到，當年讀法律時學到嘅嘢，對依家呢份工作好有用，勉勵大家努力係要有目標，但目標其實可以轉喎。