政情：自認怕咗陳克勤 區諾軒有票都唔投
立法會近期經常出現「撞會」嘅情況，往往都考起議員「分身」嘅技能，事有湊巧，尋日立法會亦有兩個會議撞時間，今次就考起立法會議員區諾軒，搞到佢要大呼「怕咗你」添，到底邊個咁得人驚呢？
撞會揀發言 失投票機會
話說尋日早上立法會非常熱鬧，事關工務小組同保安事務委員會特別會議撞時間，唔少議員都有加入以上兩個委員會，所以不時要行出行入，好似泛民議員范國威曾要求提供議員輪候發言次序畀佢哋參考，等佢好安排時間兩邊走。當輪到區諾軒發言時，咁啱隔籬房就響起表決鐘，搞到區諾軒大失方寸，即場同保安事務委員會主席陳克勤講要去投票喎，似乎就多少怕揀咗發言就投唔到票，投咗票又失去一次發言機會嘞。
然而，陳克勤對於區諾軒嘅「訴求」不為所動，於是二人重複「我要投票」、「咁唔好講住」嘅對答，最後陳克勤話已經畀機會佢選擇，之後仲叫下一位議員發言添，搞到區諾軒慨嘆「疊會我都唔想o架」，仲話怕咗陳克勤而揀發言，結果另一個會就投唔到票喎！