中環出更：海關110周年開放日 VR體驗搜違禁品
香港海關今年踏入成立一百一十周年，海關總部大樓本月廿二、廿三、廿九及三十日會開放畀公眾參觀。開放日節目有海關樂隊表演同搜查犬、緝毒犬和爆炸品搜查犬示範，市民仲可以分組導賞形式參觀大樓內設施，如海關展覽廊同室內練靶場等，市民仲可於開放日透過VR遊戲體驗海關人員搜查違禁品嘅工作。海關關長鄧以海話，部門成立一百一十年，當然唔止搞開放日，九月仲會搞慈善籌款羽毛球賽，為抗癌團體生命小戰士籌款，幫助有需要嘅癌症病人。
鄧以海話，海關負責嘅工作範疇多，開放日都未必列得晒，直言係由「由雞蛋管到原子彈，白粉管到奶粉」，而佢哋未來發展會以智能執法為主，由發展智能邊境，以至以大數據分析情報工作等。佢又話，佢哋依家已更新緊口岸邊境監察，打算引入智能X光系統，用電子方式辨別潛在違禁品，再配以人手調查同執法，進一步提升執法效率。
鄧以海撐修逃犯例助執法
對於政府擬修訂《逃犯條例》，鄧以海就話條例修訂通過咗嘅話，的確有助海關執法，例如緝毒等刑期都高於七年，所以佢都支持盡快修例。佢又話，今次事件緣於台灣殺人案，加上疑犯承認殺人，都未能夠繩之於法，實在令佢好激氣，所以修例既令犯罪者得到應有後果，亦可填補現時法律漏洞，直言︰「唔可以畀香港成為逃犯天堂而視若無睹」，認為大家應理性討論，唔需要將修例政治化。
卓妮