中環出更：細個偷用電腦 啟發黎少斌方向
每個人總有反叛嘅時候，香港生產力促進局首席數碼總監黎少斌自爆讀小學時一放學就偷偷去用親戚部電腦。以前電腦未普及，唔係每個家庭都有，唔通佢唔怕整壞？佢就話，當年偷用電腦時會一邊睇住有關電腦程式嘅書，一邊研究電腦點運作，愈嚟愈感興趣，後來仲喺呢方面發展添。
黎少斌話，由細到大都因好奇心而去嘗試新事物，細個就學鋼琴，後來見到田徑幾得意又去學，最近就學泰拳。而佢大學時係讀電腦工程，但出於好奇心，所以好多行業都做過，如裁縫同市場銷售。佢又話，自己一做熟咗一樣嘢就會想試新事物。佢咁樣算唔算三分鐘熱度呢？
林正財教囡囡自製玩具
講起反叛期，保良局總理許頴嘉亦有類似經歷，事關佢父母以前唔畀佢玩溜冰、滾軸溜冰同單車，佢就趁喺外國讀書，瞞住家人嘗試。雖然佢試過跌親，但好彩冇受傷，所以屋企人都唔發覺。佢又話爸爸好錫佢，佢細個好鍾意公仔，爸爸一定會買。但佢有小朋友後就冇咁做，只會鼓勵囝囝完成一啲任務，之後先買禮物做獎勵。
保良局總理鄧宣宏雁就話本身唔使點買玩具畀囝囝，因為囝囝啲同學會喺生日時買玩具作禮物。佢就教囝囝要與人分享，所以會將部分玩具轉讓畀其他小朋友。而安老事務委員會主席林正財話，佢細個冇乜玩具，就學用唔同物料自製玩具學識自力更生，佢囡囡細個時就一齊用紙箱起間屋同地道，希望佢哋都體驗吓喎。
卓妮