政情：為投錯票道歉 陸頌雄自嘲兼捐錢
被網民形容同藝人周星馳經典電影中角色「醬爆」撞樣嘅立法會議員陸頌雄（Michael），尋日喺Facebook發貼話自己前日喺議會內煮咗味「醬爆大蝦碌」，據悉佢呢味餸足足花咗三千蚊，認真大手筆！
其實Michael同時上載咗一幅圖，反映外界對佢投錯票嘅反應，仲發貼為前日大會佢撳錯掣，投錯票贊成泛民提出不信任特首林鄭月娥嘅議案嘅甩轆事件再一次向公眾認錯，仲話要提醒自己日後做事要冷靜「慢煮」唔好再犯。佢亦透露，因為立法會無罰款機制，而市民對議員有好大期望，佢為表誠意，決定捐出一日薪金，三千大元。
肥老闆喊冤 重申有投票
原來Michael投錯票並唔孤單，因為金融服務界張華峰（肥老闆）尋日都喊冤，明明前日有投票，立法會系統就冇顯示，搞到好似佢失蹤咁，肥老闆重申自己係反對議案o架！
