政情：甩轆讀錯簡稱 區政聯盟出師不利
民主黨（白鴿黨）內亂過後，部分前白鴿黨成員另起爐灶，尋日宣布成立「區政聯盟」，但作為聯盟召集人嘅柯耀林喺介紹聯盟嘅標誌時，就將聯盟英文名「Community Alliance」嘅簡稱「CA」，讀錯成「CQ」，仲講笑話係CQ就唔係「DQ（Disqualify，取消資格）」。聽到柯耀林讀錯之後，其他成員都即刻糾正佢，佢就拿拿聲道歉，仲再介紹多一次添。一開口就甩轆，怕唔怕會一語成讖呀？
區政聯盟嘅標誌唔止有英文簡稱，而且係由藍色同紫色組成，佢哋解釋藍色係代表本土、在地嘅聲音，紫色就係代表傳統爭取民主嘅顏色，希望可以結合兩方面嘅聲音，團結爭取大多數支持。聯盟副召集人區鎮樺解釋，佢哋係屬淺黃組織，而當中有成員支持本土，但佢哋並唔係支持港獨、自決，只係希望將香港嘅資源畀番香港人。
一齊退黨 劉其烽冇加入
聯盟由三個團隊組成，當中會有十二位區議員同埋十七位社區主任，有部分人都係屬於上年白鴿黨爆發退黨潮嘅成員。不過，當時有一齊退黨嘅北區區議員劉其烽，就冇加入到喇，區鎮樺就解釋原本劉係其中一個成員，但由於佢有其他安排，所以最後決定唔加入，不過會繼續合作。