政情：懶理市民意見 李啟榮落區被鬧爆
教育局經常教學生做好生涯規劃，多聽其他人意見，但政府部門做地方規劃時，又有冇認真聆聽呢？話說旺角洗衣街政府用地擬建摩天商業大廈，區內反對聲音強勁，尋日有區議員趁規劃署長李啟榮到訪區議會，炮轟當局一意孤行，規劃市民！
李啟榮喺會上先介紹多個區內項目，亦似係明知會被人質問，先自招提及洗衣街用地，話上周城規會會議已通過加入條款，將來該用地發展商必須交發展藍圖，再經審議先可以動工o架。
區議員嘲市民被規劃
區議員黃建新就認為，根本係市民同區議會被規劃，政府聲稱諮詢區議會，但區議員有區議員噏，部門就負責走程序，市民意見都唔聽，一意孤行強推規劃，諷刺話將來九龍公園地下城都會係咁o架咋。
區議會副主席黃舒明都話規劃署搞大綱圖，市建局又研究用地，政府就土地大辯論，批評內容重複，質問最終報告會係互補互通，定各自表述，要署長解釋吓。佢語氣強硬話，政府係咪要認真考慮吓檢討規劃標準與準則，擔心再唔更新，香港就會大落後。