政情：政府帶頭虐老 徐英偉代羅致光受靶

推動長者就業 港府零支援

郭偉强開腔就直接點出香港人口老化問題，仲話政府雖然搞過一個人口政策督導委員會出嚟，可惜就「有頭威冇尾陣」，雖然發現問題嚴重，但對策竟然係「收緊荷包」，大鬧政府為咗睇住盤數，長者唔到六十五歲都拎唔到啲福利，仲要逼長者出去就業，直言長者好難搵工，即使搵到好多時都要被剝削，叫政府如果想推動長者就業，就應該要搞番多啲就業支援，例如提供專供專門就業計劃、再培訓課程等，仲話新加坡、日本等都有法例支援長者就業，相比之下香港可謂「零支援」咁話。

鄺俊宇：安老服務一塌糊塗

鬧得狠嘅仲有身兼立法會福利事務委員會主席嘅鄺俊宇，直斥政府「帶頭虐老」，又擔心政府會進一步收緊長者綜援門檻至七十歲，仲提到近日政府推行嘅「統一評估機制」，迫使長者喺社區照顧服務同院舍照顧服務二擇其一，唔可以再同時輪候，斥政府安老服務一塌糊塗。佢仲話政府近年財政儲備高企，只要肯撥幾億出嚟已經可以推好多福利政策，幫到好多長者。

雖然建制泛民議員都齊齊鬧爆，但勞福局似乎冇吸收年頭收緊長者綜援申領門檻一役嘅教訓，徐英偉解釋，隨住人口老化，長者人口同相應開支會不斷增加，所以為咗社會嘅持續性，政府冇計劃降低各個長者福利政策嘅申領年齡，仲重申人口老化係全球趨勢，政府會加強長者就業服務。

其實喺福利呢個話題上，民意從來都好明顯，畢竟長者幾十年嚟為社會付出咁多，社會各界都覺得應當厚待長者，如果政府繼續漠視民意，羅致光同徐英偉日後都唔知要做多幾多次箭靶喇！