政情：公民講場：任領展加租乜都貴 陳帆被轟冇新思維

被稱為本港「三座大山」之一嘅領展多年嚟問題多多，旗下同埋已轉售嘅物業不斷劏舖加租，搞到百物騰貴，亦有物業長期空置，成日畀市民及議員鬧爆，可惜政府多年嚟都懶懶閒唔理，搞到有立法會議員終要出手，提出私人條例草案，望引入規管租金增幅嘅機制，及令現有租約續期可有優先權等，以規管房屋委員會出售予領展及領展已轉售嘅物業。不過運輸及房屋局尋日就回應話冇足夠基礎去支持議員嘅私人條例草案，令議員十分失望。領展瘋狂加租等問題影響市民生活。如議員所講咁，運房局局長陳帆如冇新思維新辦法，又唔接納意見，咁就真係抵鬧喇。