政情：頻收性騷擾電話 林琳稱已報警調查
面對性騷擾絕對應該零容忍。荃灣區議員林琳尋日喺社交網站話收到一個陌生來電嘅性騷擾，前前後後一共打咗四次畀佢，話要睇佢嘅敏感私人部位。林起初都嚇一嚇，不過之後就好冷靜咁回應，唔止問對方叫咩名，仲同對方講：「如果想睇咪落嚟辦事處囉！」不過對方就冇再答林，亦都冇去林嘅辦事處，最後林公開咗呢個電話號碼，仲笑言有需要可以聯絡嗰位人士。而林亦已就事件報警。
沙田區議員黃冰芬見到林琳貼文，都留言話自己都曾收過同一個電話騷擾。林接受查詢時就話，因為議員嘅電話號碼係公開嘅，所以久唔久都會收到唔同程度嘅性騷擾電話，不過佢聲言已經受夠，故必須要出聲。
「慣犯」常捧場 其實為抽水
林琳仲話，早前同幾名年輕女議員傾偈時講起，原來大家都經常受到騷擾，唔止係電話騷擾，仲有出席活動時被人借啲意搭膊頭，小動作多多，其中有個「慣犯」經常對佢哋嘅活動好「捧場」，其實係去「抽水」。林話依家已經認得呢位常客，識得安排隔開對方咁話。