政情：腳傷無得郁 趙麗娟畀人話發福
手腳整傷會影響行動，活動減少分分鐘會搞到體重上升，香港會計師公會前會長趙麗娟似乎好有同感，事關佢右腳大半年前受傷後，連自己都感覺到發福囉。
趙麗娟去年因追車搞到骨裂，佢就話現時已無大礙，連物理治療都唔使做，但佢笑稱因年齡關係，骨裂位置仍未完全埋口，所以跳跳紮嘅劇烈運動暫時放埋一邊，包括佢鍾意嘅跳舞嘞。佢更自爆，早前與舊朋友見面時，對方好有禮貌話佢精神咗，原因係發福咗喎。不過當日見佢身形冇點走樣，佢大可以放心喎。但佢就呻只係從衣着入手遮住咗咋。
大半年無做劇烈運動
雖然趙麗娟大半年未能夠重拾跳舞鞋，但都唔使擔心佢會悶親，事關佢興趣多多，好似近期就計劃透過訪問身邊嘅女性朋友，將佢哋實幹嘅故事集結成書，分享女性嘅管理理念、點樣平衡事業同家庭等，直言係貼地、實戰嘅故事夠好聽喎。