政情：黃偉鴻拯救小燕子 遍地黃金都唔介意
若果見到屋企遍地黃金，你會有乜嘢反應呢？中華廠商聯合會會董黃偉鴻日前喺Facebook貼文，話香港地寸金尺土， 一家五口住喺兩平方吋，所以搞到間屋成地黃金，因乜解究黃金得兩平方吋，實情黃講嘅「黃金」係雀屎，而兩平方吋係燕子巢，佢話唔介意「遍地黃金」仲披露救過小燕子添！
話說有日夜晚，黃發現喺佢車上有嘢郁郁下，原來係燕子BB學飛不遂，又返唔去雀巢， 由於佢住嘅屋邨有好多野貓，而且又落緊雨，所以用手攞起佢，放咗喺一個安全嘅地方，仲話初頭燕子BB都掙扎，而且吱吱叫。
造咗個安樂窩畀燕子
過咗一段時間再探佢，將燕子BB放喺手，但都係飛唔到，惟有將燕子BB放入屋內，跟住佢為燕子BB造咗個臨時嘅安樂窩，即係紙箱，裏面仲放咗水同乾糧，之後將個紙箱吊上窗外，諗住近番個雀巢，畀燕子父母好好照顧番佢，最後喺翌日朝早，燕子BB就飛返自己屋企，拯救燕子BB行動就告一段落嘞！