政情：羅致光又休假 徐英偉頂上做箭靶
政府最近先後因為收緊申領長者綜援合資格年齡，同埋更新安老服務統一評估機制，令長者日後或只能喺輪候院舍同社區照顧之間二揀一，被外界鬧爆對長者涼薄，只為做靚盤數，而非真心為長者推行政策。勞工及福利局局長羅致光理應盡力「拆彈」，不過佢就喺呢個時候計劃放假，似乎佢真係好努力爭取打工仔權益，不過淨係爭取佢自己作為打工仔嘅權益啫。
啱啱五一先放完長假
根據政府最新憲報，羅致光將於下周四（30日）開始休假，至下月五日先至復工，合共休假六日，而羅休假期間，就會由勞福局副局長徐英偉（Caspar）兼任埋局長嘅職務。即係話，呢段時間有乜突發事件，又係Caspar幫手擋箭喇。
翻查番紀錄，羅致光喺五一勞動節亦都有放假，當時就係由本月一日放到本月六日，同今次一樣都係放六日。羅可以喺一個月之內放兩次大假，相信都令本港唔少打工仔羨慕不已喇。