中環出更：邵家臻在獄 工作有替身唔知足
社會福利界立法會議員邵家臻因為違法佔領行動案而被判囚八個月，現時正喺赤柱監獄服刑。不過唔知係咪怕被人質疑佢因坐監而無法履行議員職務，搞到被褫奪議員資格，其議員辦事處喺佢被判囚以來仍繼續以邵嘅名義去信政府提問，又喺立法會大會提出口頭質詢。立法會秘書處早前已接獲邵嘅要求，批准他人代佢提出口頭質詢，但泛民就仍唔知足，呢啲咪叫得寸進尺囉。
立法會內務委員會尋日就討論下周三（29日）立法會大會事宜，當日第一條議員口頭質詢係由邵家臻提出。立法會秘書長陳維安就話，秘書處已經收到邵嘅信件，要求由另一名泛民議員代佢提出口頭質詢，而立法會主席梁君彥已經批准邵嘅要求。
仲要求親身出席立會
點知泛民對此仍然唔滿意，仲話最新掌握嘅訊息係邵家臻希望親身出席會議提出質詢，希望內會去信懲教署，促請該署批准邵下周三出席會議。而資訊科技界立法會議員莫乃光就話，佢尋日朝早前往探監，證實邵最希望係親身到立法會，因為咁先可以提出跟進問題，以及履行代表業界嘅責任。不過秘書處就指出，至尋日仍未收到邵嘅任何信件，陳維安所言已係目前掌握嘅最新情況喎。
卓妮