中環出更：網購曾出事甄韋喬蝕幾千
依家愈嚟愈多人選擇網上購物，喺手機或電腦撳個掣畀錢就會有人送貨，認真方便。不過網購只可網上睇，唔可以親手接觸實物，隨時都會中伏。深水埗各界慶典委員會會長甄韋喬（Mickey）就自爆曾上網買嘢出事，浪費咗成幾千蚊，依家佢只會網購本身有認識嘅產品，睇嚟見過鬼真係會怕黑喎。
Mickey早前出席深水埗節活動時話，以前成日都行深水埗，特別鍾意去鴨寮街同電腦中心，事關以前最新款嘅電器都可以喺鴨寮街搵到。但因為依家可以網購，已經少咗去鴨寮街。講起網購，佢就話曾喺外國網站買一部可噴字嘅機器，但到貨時就發現部機器運作唔到，之後仲搵唔番個網站，幾千蚊就咁白白花費咗。不過，佢最近又見到個網站「翻生」，已即刻叫同事跟進，結局係點就未知喇。
王嘉恩親自操刀砌電腦
同場仲有慶典委員會主席黃達東同名譽顧問王嘉恩（Albert）。Albert都會去鴨寮街同電腦中心買零件返屋企，自己一手一腳去砌部電腦出嚟，直到依家佢屋企用緊嘅電腦都係由佢親自操刀，認真厲害。而黃就話佢喺深水埗住過，而且仲係住喺電腦中心附近，不過佢以前就多數都同啲同學去美孚玩咁話。
當日在場嘅仲有立法會議員陳凱欣，見佢只戴一隻耳機，唔通又係新款玩意？佢就話，耳機係一對仔女送嘅母親節禮物，因為平時立法會開會時，佢都會將電話放埋一邊，有時仔女放學又撞正開會，打畀佢時會冇人聽，所以一對仔女為咗媽媽可以知道佢哋打嚟，就決定送耳機，方便媽媽知道有電話要接。雖然立法會工作忙碌，但相信陳一聽到仔女打嚟，疲勞應該會即刻減半喇。
卓妮