政情：收料站：連任兩屆主席 顏汶羽未超齡都要落莊
唔少政黨都設有青年委員會，提供平台畀黨內年輕一輩，其中青年民建聯（青民）已經成立多年，三十五歲以下嘅會員自動加入，現任主席顏汶羽已做咗兩屆，但聽聞未超齡嘅佢都要卸任喇！
接班人需有學歷專業背景
青民本身將有大換血，事關現時班子中有多人超過年齡限制，六名主席及副主席中有多人因超齡要自動落車，而顏汶羽今年初仍大打開口牌講明想冧莊。不過，民建聯（民記）領導層喺上月換屆，顏汶羽已升呢擔任增設嘅副秘書長一職，進身領導層行列，現時就有傳呢個由民記中委委任嘅青民主席會換人，令到仍然符合年齡資格嘅顏汶羽要落莊。
據了解，新任主席人選傾向搵有學歷、專業背景人士擔任，希望令青民有專業同新嘅氣象，所以未必再由區議員擔任主席。而過去青民嘅前主席分別係立法會議員周浩鼎同張國鈞，兩人同樣有專業背景，初出任主席時都未選到區議員，所以搵個未有政績人選並非無先例。此外，民記近年吸納唔少高學歷嘅新血，所以不乏符合心水嘅人選，聽聞中西區社區主任施永泰獲睇高一線。