政情：山竹塌樹陰影 鄉議局申撥款買電鋸自救
舊年超強颱風山竹襲港，對偏遠鄉郊影響深遠，有唔少鄉村塌樹阻礙村民出入，如果災情再現都咪話唔大鑊，難怪新界鄉議局日前開會都決定申請撥款買電鋸等物資，寧願自救都唔等人救喇！
鄉議局決定向華人永遠墳場管理委員會申請撥款，購買電鋸、護目鏡、安全帽等物資放喺鄉委會同村公所，日後有颱風吹襲後，都可以有工具去清理阻塞道路嘅樹幹同枝葉，亦會有專人教授點樣適當使用相關工具。
大嘆政府清理速度慢
提出有關建議嘅鄉議局總務委員會主任委員鍾偉平就大嘆，山竹見到政府部門處理速度慢，又凸顯咗鄉村欠缺工具去清理，所以希望日後每個鄉有三把大鋸、每條村有兩把小鋸，令到萬一有意外都及時有工具清理，方便村民咁話。