滿18歲即入表 DSE考生慶幸有父幹
【本報訊】年輕人常言「上車靠父幹」，只有十九歲的李同學正等候文憑試（DSE）放榜，昨與二十歲正修讀大學一年級的張同學一同取表，分別打算以白表單人資格申請今期居屋。李表示早已計劃滿十八歲即入表，直言幸好有「父幹」，若成功抽中單位，父母會幫忙支付首期，屆時自己會邊讀書邊做兼職幫手供樓。
李同學昨日一早到樂富房委會客務中心索取居屋申請表，今次是他第一次申請，「一直都想申請，見滿咗十八歲，又冇嘢做就過嚟啦，都要為自己打算吓，見到今期居屋位置、大細都非常適合日後居住」。現時不少大學生未畢業先輪候公屋，希望有「一屋」在手，但他認為十八歲輪公屋不切實際，「都唔知輪到幾時，唔通三十年咩？與其花時間申請公屋，不如諗吓其他方法」。
大學生：倘抽中兼職供樓
張同學現與家人同住於居屋單位，直言「睇電視都見到樓價係咁升，都要為自己籌謀」。他又指，自知白表單身申請抽中機會渺茫，「如果抽中情願去少啲旅行，出少啲街食飯，一路讀大學一路做兼職供樓」。
另外，現居於九龍城公屋單位的羅先生表示，計劃與子女一同以綠表家庭資格申請今期居屋，希望成功購買何文田或沙田居屋的大單位，他坦言「老人家過唔到名畀個孫」，期望日後將單位留給孫兒，「現時私樓太貴，買到都冇用，買副棺材仲好！」