政情：吳傑莊減肥過龍 體重超標變唔達標
今時今日人人都追求健康，當中有人鍾意做運動，亦有人選擇控制飲食。世界華商聯合促進會青年委員會主席吳傑莊（Johnny）因為之前驗身驗出「三高」，於是即刻搵營養師幫手減肥。事隔一排見佢清減咗唔少，點知一問之下，原來佢減肥減過龍，由本身體重超標，減到依家唔達標，比標準體重仲減多咗幾磅。
「秘訣」係控制飲食
不過Johnny就冇打算即刻增磅，佢話因為如果增磅就唔止係要食嘢，而且需要操Fit，而佢近期比較忙，每日只係瞓得四小時，連以前經常跑步呢個習慣都冇埋，更遑論要額外花時間做健身，所以就算想增磅，都要遲啲先得喇。
Johnny又話，近年愈嚟愈多人減肥，不過各種方法中，佢就認為控制飲食最有效，反而做運動嘅減肥效果較差，因為一個人嘅體重同其他健康指數有超過七成都係受制於飲食，其餘兩成多先係運動，所以若果想減肥，就要考慮飲食為先，運動過量反而會傷關節。至於點解咁多人節食減肥都唔成功，佢就話係恒心問題喎。