政情:政府拆彈關鍵時刻 朱曼鈴放假24日

政府民望進一步插水,多名政治問責官員嘅評分同支持度最近都創上任以來嘅新低,而政府近日亦忙於就《逃犯條例》修訂作解說,肩負起政府領導層傳媒顧問同宣傳工作嘅政府新聞處處長朱曼鈴(Cathy),理應諗諗計挽救政府低落形象,幫政府「拆彈」做好解說工作,不過佢就喺呢個水深火熱嘅關頭放大假,仲放足廿四日,真係梳乎。

兩副處長兼任職務

根據憲報,Cathy今日起開始休假,直至下個月十一日先至復工,佢放大假期間,就由新聞處副處長(一)梁潤芝同副處長(二)斐博歷兼任新聞處處長工作。而Cathy休假咁耐會唔會離開香港就唔知喇。

原為旅遊事務專員嘅Cathy去年二月先出任新聞處處長,最「一舉成名」嘅事迹可以話係去年十二月土地供應專責小組發表報告,當時採訪嘅記者要席地而坐記錄內容,年屆六旬嘅小組主席黃遠輝更要企足一個鐘回應。政府事後都要承認係有改善空間,擺明係指Cathy做得唔好喇。

第一手消息請下載on.cc東網iPhone/iPad/Android/Windows Phone Apps