政情：夜訪公園考察 鄺俊宇話最驚曱甴
立法會議員鄺俊宇（Roy）本身係註冊社工，今個立法年度更出任立法會福利事務委員會主席。日前Roy就同多名立法會議員為咗公務要做實地考察，於是就夜訪公園，去見喺公園嘅露宿者。以為呢啲工作難唔到Roy，點知原來都唔係嘅。
Roy話，當年讀社工時都會喺夜晚落區接觸唔同服務對象，亦都包括露宿者，可能佢個樣「冇害」，而且擅長撩人傾偈，所以好易就可以成功接觸到露宿者。露宿環境當然唔理想，老鼠、曱甴等害蟲一定唔少，Roy就話︰「邊有人唔驚曱甴o架？」坦言唔敢想像曱甴埋身嘅情景，仲話好彩無試過，但佢到訪板間房時，就避唔過被啲木蝨咬喇。
露宿者問題刻不容緩
當晚去嘅公園Roy都曾經探訪過，佢仲好感慨咁話，事隔幾年，情況仲嚴重咗，講到有人寧願瞓街，都唔住板間房，佢就話心都噏埋。佢又話，露宿者住開揚嘅地方其實並唔理想，因為財物容易遺失，又會容易激起同附近居民嘅衝突，覺得現時問題的確刻不容緩，佢都要思考吓點樣跟進先得喎。