政情：加會審國歌法泛民拉布狂點人數 立會變遊樂場

3委員會撞到應 1個焗休會

立法會尋日朝早唔止有審議國歌法嘅法案委員會開會，同時仲有工務小組委員會，以及審議規管電子煙法例嘅《二零一九年吸煙（公眾衞生）（修訂）條例草案》委員會。國歌法委員會原本今日朝早都開會，不過喺本周二就決定喺尋日朝早八時四十五分再加開兩小時會議，同喺尋日朝早八時半開會嘅工務小組，以及有關電子煙嘅法案委員會撞到應。而有關電子煙嘅法案委員會開會時仲差啲因為唔夠開會法定人數而流會，好彩最後一刻都有議員趕得切入會議室。

咪以為夠人就可以正常開會，三個會一開始，民主派議員郭家麒、范國威、區諾軒、陳志全就輪流喺唔同會議上要求點人數，搞到點人數嘅鐘聲響完又響，建制派穿梭趕到會議室，真係疲於奔命。至約早上九時十五分，審議規管電子煙嘅法案委員會主席郭偉强就率先「投降」，宣布休會，令其餘兩個委員會嘅會議總算可以順利進行，佢仲形容自己係「壯士斷臂」。而副主席葛珮帆就話立法會並非遊樂場，仲鬧爆民主派係惡意破壞會議，認為佢哋要負責任。

廖長江話國歌法流會無所謂

雖然係咁，民主派對點人數都係樂此不疲。以國歌法法案委員會為例，約兩小時會議就先後點算六次法定人數，喺其中一次點人數期間，該委員會主席廖長江（Martin）同副主席張國鈞講︰「流一流國歌法我都冇乜所謂，等啲人警惕吓囉。」而Martin呢句說話就因為冇熄咪而被公開，仲搞到之後都要解畫。不過，如果Martin以為流咗會，民主派係會有所警惕，咁就可能有啲太傻太天真喇。

講開又講，民主派不時玩嘢、拉布，搞到會議進度緩慢，先至要加開會議，依家加開會議，佢哋又再玩嘢拉布，真係惡性循環喇。