中環出更：黃國健何君堯叫錯最資深議員個名
立法會開會間唔中都出現議員名字被叫錯或讀錯嘅情況，特別係剛出任議員嘅立法會「新丁」，被人叫錯名都唔出奇。不過尋日立法會議員黃國健（KK）同何君堯就喺同一會議，不約而同叫錯咗地產及建造界立法會議員石禮謙個名。石作為立法會建制派嘅最資深議員，個名都可以被人叫錯，真係唔知邊個要檢討喇。
各自讀錯兩次
尋日立法會內務委員會開會，KK發言時就誤將石禮謙個名叫咗做「石乃謙」，短短兩分鐘嘅發言就讀錯咗兩次，期間仲完全冇發現自己叫錯。而到何君堯發言時，何就將石叫咗做「食禮謙」，同樣都叫錯兩次，同KK唔同嘅係佢有糾正，將石嘅名讀番正確。
可能聽到KK讀錯名而不自知，會上就有民主派議員糾正KK，不過KK嘅黨友、立法會議員麥美娟就批評對方讀得書多就走去笑讀書唔多嘅KK講嘢唔正，認為覺得醜嘅應該係對方先啱。而作為民主派一員嘅議員譚文豪就反擊，話何君堯都讀錯，證明讀錯名係同學歷冇關，點知就被其他議員重提其錯讀四字成語一事。議會內經常都有人讀錯字，何必嚴以律人，寬以待己呢？
卓妮