政情：怕撞法案委員會 立會足球賽改期

連場地都轉埋

原定喺星期六嘅球賽會喺深水埗運動場舉行，足球隊召集人何俊賢（高佬賢）就話本來仲邀請埋黨友、身兼深水埗區區議員嘅立法會議員鄭泳舜一齊落場添，話因為係佢地頭喎。之不過嚟緊唔止改日子，連場地都轉埋，由深水埗運動場轉去元朗大球場踢，唔知鄭泳舜到時會唔會都照樣去踢呢？

點解會改期？高佬賢話因為最近有唔少法案委員會要開會，包括國歌條例草案同埋修訂逃犯條例草案，有時都要加開會議，所以喺評估過風險後，都係決定改期喎。佢仲話好多時球賽都喺星期六舉行，但眼見依家好多時星期六都要加會，所以就索性改喺星期日進行。話到明係友誼賽，唔知兩派議員踢完之後，會唔會乘機踢走埋啲怨氣呢？