政情：參觀英國媒體 陳智遠做天氣報道員
離開咗「熱廚房」之後，食物及衞生局前政治助理陳智遠專攻保育，不時帶古蹟導賞團，原來最近又有新工喎，開邊瓣？
陳智遠之前喺Facebook貼文話會離開香港，但去邊同做乜就大賣關子，使唔使咁神秘呀！日前佢終於暴露行蹤，原來去咗英國，仲貼文話大家會睇到佢報天氣，原來佢去咗參觀當地嘅媒體，仲做埋天氣報道員添！
最掛住橫行地鐵嘅老鼠仔
呢次係舊地重遊，佢仲話其中一樣最掛住倫敦嘅嘢，就係地鐵路軌上橫行招搖嘅老鼠仔，但唔知點解今次嚟到，一隻都見唔到，就連新民黨前政策總裁袁彌昌都有同感，留言話「我都發覺係」。
唔係呀？香港變咗老鼠樂園，市民不知幾困擾，陳智遠竟然掛住倫敦地鐵嘅老鼠仔。既然佢咁掛住啲老鼠仔，有網友就留言，講笑咁話啲老鼠都要放假，另有網友就建議佢去紐約地鐵，話嗰度有大把老鼠仔等緊佢喎。