政情：議會衝突受傷 葛珮帆陳恒鑌獲贈鎮痛貼
立法會近期立立亂，好似上周六負責審議《逃犯條例》修訂嘅法案委員會，泛民就同建制派就爆發正面衝突，議員搞到又要報警同送院，議會氣氛相當緊張。而議員葛珮帆（EQ）同陳恒鑌當日都有去醫院驗傷，尋日更大晒獲贈送嘅鎮痛貼。
當日陳恒鑌肩膀受傷紮住左手見人，EQ驗傷後就證實頸後軟組織受傷，而佢哋尋日就收到鎮痛貼，對方話見到立法會有衝突好擔心，加上知道今次有保安同埋議員齊齊受傷，所以就送畀佢哋當慰問喎。
EQ嘆做議員要捱打
EQ話呢啲鎮痛貼係由中藥業界朋友所送贈，由行內人所贈送，唔知藥效會唔會特別顯著，用後好快就痊愈呢？EQ同陳恒鑌都話要即刻用，EQ更嘆估唔到做議員都要捱打，同埋識打木人巷先開到會，希望唔會再有呢啲場面喎。其實呢個都係香港市民卑微嘅心願嚟，唔知幾時先實現到喇！