中環出更：預算案表決在即 陳茂波短訊向議員拉票
新一份財政預算案劣評如潮，政府跪低派四千蚊亦派到天怒人怨。立法會尋日繼續審議預算案，可能驚過唔到關，財政司司長陳茂波（波叔）喺會上用手機發訊息畀議員，促請給予支持，擺明係拉票，唔通信唔過啲政治助理？
波叔尋日喺立法會坐鎮，期間發現佢攞手機出嚟，對住個電話口噏噏，原來佢係語音輸入變成文字，然後向議員發訊息。內文係話「最近議會的工作辛苦您了，我原不好意思再打擾你，但今明兩日是立法會大會，繼續審議財政預算案，估計明天議員應該可以投票，希望屆時能得到您支持！您的肯定，會鼓勵我們整個團隊繼續全心全意為香港打拼。」
激民憤補鑊 臨急抱佛腳
呢段訊息係傳畀建制派議員劉國勳，而下款就寫住「Paul」（佢嘅洋名），相信所有建制派議員都收到，亦見到佢發畀部分民主派議員。老實講，份預算案做得咁差激起民憤，當然要搵人撐，但到咗依家就嚟表決先拉票，臨急抱佛腳又有冇用呢？
卓妮