中環出更：彭芷君關注留守兒童問題 諗計釋放山區婦女勞動力
內地農村經常因已婚婦女到城市謀生，留守兒童問題愈嚟愈嚴重。香港廣西婦女聯會（聯會）主席彭芷君早前就為廣西某偏遠山區打通營銷渠道，令當地婦女能夠喺屋企生產具有桂繡藝術嘅商品，咁就得以賺取收入之餘，亦可同時照料家中老少。
彭芷君呢種做法同香港五、六十年代工廠向家庭主婦外發串膠花嘅概念如出一轍。咁香港嘅婦女又可唔可以居家就業呢？佢認為可行，但前提係唔可以重複過去串膠花或穿錶帶等簡單工作，因為香港人工貴，生活水平又高，居家生產嘅商品一定要有新設計元素或文化內涵，成為消費者眼中一件有溫度、有故事嘅物品，先可創造巿場需求，居家就業至有持續落去嘅條件。至於點樣設計同生產迎合消費者胃口嘅商品，咁就要動吓腦筋啦！
轉頭見到聯會秘書長歐陽鳳盈同常務理事彭舜玟。歐陽鳳盈話細個時都見過媽咪用衣車縫合成衣組件嘅外發工作，由於媽咪一邊工作，一邊又不分晝夜咁照顧佢，所以母女嘅關係都好親密，而媽咪嘅勤奮亦向佢樹立積極同正面嘅榜樣。佢話互聯網時代形成新經濟模式，設計製造同銷售一條龍，居家就業未嘗唔係婦女兼顧事業同家庭嘅好方法。
蔡毅明籲善待外傭
金紫荊女企業家協會副主席蔡毅明嚟緊九月就榮升第二任媽咪，佢話身為人母又要兼顧事業，往往要等小朋友瞓咗先着手自己嘅工作。由於佢係做時裝設計，揀選布料必須親自觸摸，所以唔可能居家就業。佢又話香港婦女嘅勞動力得以釋放，好大程度係有賴外傭姐姐幫手，而離鄉別井來港打工嘅外傭姐姐嘅付出都好大，因此僱主必須予以善待，而佢同外傭姐姐維持咗十幾年僱傭關係，大家得閒仲會分享湊仔心得添！
卓妮