政情：公民講場：ETV收視低 教師呻唔夠時間睇

審計報告去年底曾批評教育電視（ETV）成本高、收看率低，教協尋日公布嘅一項調查話，逾九成受訪小學教師覺得ETV有正面幫助，不過有三成八受訪教師話甚少或從不喺課堂上使用ETV教學，其中八成三人話係因為課時不足，可見小學課程有幾咁緊迫。講真嗰句，教育局局長楊潤雄應該處理吓啲小學課程內容啦，多嘢教到教唔切，連播一播ETV都冇時間嘅話，日後ETV拍到奧斯卡得獎電影咁都冇用啦，而且啲小朋友要學咁多嘢，隨時係囫圇吞棗，學完轉個頭都唔記得添。