政情：徐曉杰喜迎B女 母親節收最好禮物
對於唔少爸爸媽媽嚟講，最好嘅禮物就係小朋友。葵青區議員徐曉杰（Jonathan）喺母親節前一日，細女出世，重七磅幾。聽落真係一份好好嘅母親節禮物！Jonathan話，大仔同佢比較似樣，細女就同太太比較似樣，一人似一個，夠晒公平喎。
慶幸冇撞正一日遊
Jonathan話，B女雖然足月，但係都早咗一個多星期出世，咁啱撞正母親節前夕，好多地區活動，佢凌晨陪完太太生BB，之後已經要帶一日遊，真係聽到都覺得辛苦！不過，佢話都算好吖，起碼冇撞正舉行一日遊嗰個時間，認真捱得！
佢又話，今次係第二個小朋友出世，有咗上次大仔出世嘅經驗，所以今次都淡定好多，亦都識得做好準備，例如已經請定陪月幫手，B女未出世前，仲教定大仔叫B女個名，等阿仔習慣吓。咁怕唔怕大仔好快會呷醋呢？佢話到時至算喎，自己都好享受教小朋友嘅咁話。