政情:審核交流小組缺席者多 張建宗被轟委任偏頗

政府近年大力推動青年走出去交流同實習,尤其鼓勵青年返內地,加深認識國家擴闊視野,青年發展委員會轄下仲有個專責小組,負責審核青年內地交流資助計劃添。不過,根據當局回覆立法會議員區諾軒就特別財會嘅提問時透露,呢個專責小組喺二○一八/一九年度開嘅三次會中,仍有委員缺席兩次。區諾軒批評,獲委任但又唔開會等同「廢柴」,政府喺委任過程有偏頗。咁又係呀,霸住啲位又唔開會,擺個稻草人落去都得啦!作為青年發展委員會主席嘅政務司司長張建宗,係咪應該督促吓啲委員去開小組會呢?

其實呢個小組有委員缺席,並非首次發生。青年發展委員會嘅前身青年事務委員會,轄下亦有一個類似嘅工作小組,審計報告都揭發過小組缺席率高,好似一四/一五年度就有五名委員未有出席過任何會議,即接近兩成人無開過會,而一五/一六年度同一六/一七年度就有所改善,只有兩名委員未喺該年無蒲過頭,但計落都佔咗接近一成人,審計報告仲開到聲要加強委員嘅參與添。

僅謝曉虹從未出席會議

青年發展委員會改組後,轄下嘅呢個青年交流和實習專責小組,仍然有人出席率欠佳。根據民政事務局回覆財政預算案書面問題,呢個專責小組喺一八/一九年度中開咗三次會同十次評審小組面試,只計三個會議,二十六名成員中只有一人無開過會,佢就係明匯智庫副總監謝曉虹,不過佢其中一次會議係因申報利益後被要求避席,佢就話開小組會議時撞正不在港,但大會全部有出席,其餘兩個專責小組出席率都唔差,自言屬勤力嘅委員。

姚國威余嫿有公務在身

另外,元朗區議員姚國威同埋傑出青年協會前主席余嫿都曾經缺席兩次。姚國威就話,兩次缺席都有其他公務在身,但可行情況下都會分配時間參與同出席。至於余嫿就話,自己係青年發展委員會新委員,所以積極參加三個專責小組,大會每次都準時出席,未能出席小組會議應該係撞咗其他會議咁話。

區諾軒就批評,獲政府委任加入諮詢架構,但又唔開會,等同「廢柴」,政府喺委任成員過程亦有偏頗,甚至視委任為政治酬勞,窒礙真正聲音進入諮詢架構,令到政策變得「離地」,促請政府檢討日後委任嘅人選喇。唔知張建宗睇到呢啲數字後,下屆會唔會考慮委任其他比較得閒,又唔會有利益衝突嘅人選呢?

第一手消息請下載on.cc東網iPhone/iPad/Android/Windows Phone Apps